Óska eftir sterku umboði í 3. sæti.

 Ég hef verið varaborgarfulltrúi Samfylkingarinnar frá árinu 2019, og undanfarið fyrsti varaborgarfulltrúi, sem hefur sérstaka stöðu. Mjög lærdómsríkur tími. Ég leiddi Íbúaráð Breiðholts í fimm ár, Öldungaráð Reykjavíkurborgar frá 2022 og var varamaður í stjórn Orkuveitunnar, í skóla- og frístundaráði og í innkauparáði þangað til gamli meirihlutinn sprakk. Í nýja samstarfinu er ég fulltrúi í menningar- og íþróttaráði, í velferðaráði og í innkauparáði, og fer fyrir samstarfsnefnd skíðasvæðanna á höfuðborgarsvæðinu, sem er skemmtilegt fyrir skíðaáhugamann. 

Mál barna og ungmenna standa mér sérstaklega nærri, enda á ég sjálf þrjú börn á aldrinum 10‒17 ára. Ég hef sérstakan áhuga á þátttöku barna í skipulegu tómstundastarfi, þátttöku sem snýst ekki bara um frístundir eða hreyfingu heldur líka um þá mikilvægu tilfinningu að fá að tilheyra hópi, eignast vini og félaga, og vera hluti af skólanum, hverfinu, samfélaginu. Enginn á að þurfa sitja eftir, og ég vil tryggja að börn og ungmenni fái tækifæri til að taka þátt á sínum eigin forsendum, án félagslegra, fjárhagslegra eða menningarlegra hindrana. Það er brýnt að skapa samfélag þar sem öll börn fá að njóta sín og hæfileika sinna, óháð uppruna, tekjum, búsetu og félagslegri stöðu. Þetta er auðvitað fyrst og fremst fyrir börnin og framtíð þeirra ‒ en líka mikilvægt velferðarmál, og snertir kjarna jafnaðarstefnunnar. Það var stórt skref fyrir börnin í Breiðholti þegar verkefnið Frístundir í Breiðholti fór í gang árið 2020 til að ná til barna í viðkvæmri stöðu. Á vegum verkefnisins hefur sérstakur frístundatengill gengið í alla skólana og tekið yfir þúsund viðtöl við börn og foreldra, til að styðja þau, valdefla og leiðbeina við að finna sinn stað. Samhliða var stofnaður styrktarsjóður, og hefur verið veitt fé úr honum til 136 verkefna sem tengjast viðbótarkostnaði sem fellur til við tómstundastarf ‒ svo sem leiga á fiðlu, búningakaup, mótagjöld og ferðastyrkir. 

Á næsta ári verður ráðinn annar frístundatengill og stofnaður nýr styrktarsjóður með 5 milljónum króna með Breiðholtsverkefnið sem fyrirmynd. Smám saman verður til teymi frístundatengla sem þræðir borgina og nýtir vinnulagið úr Breiðholti til að finna börn og ungmenni sem þurfa fjárhagslegan, félagslegan eða menningarlegan stuðning. Þeir taka með þeim samtal og valdefla þau áfram inn í þá tegund tómstunda þar sem þeim líður vel, þar sem þau ná að tilheyra og styrkjast. Börn í viðkvæmri stöðu úti um alla borg fá þannig stuðning, ekki bara þau sem búa í Breiðholti. Af þessu er ég ótrúlega stolt. 

 Sem formaður öldungaráðs lagði ég áherslu á fjölbreytt búsetuform og kynslóðakjarna til að sporna við einni helstu meinsemd 21. aldar ‒ einmanaleikanum. Mér fannst líka mikilvægt að koma á samræmdri upplýsingagjöf í þágu eldra fólks. 

Á vettvangi íbúaráðsins í Breiðholti beitti ég mér fyrir úrbótum i umferðaröryggi í Efra Breiðholti. Þar er núna búið að endurbæta níu gangbrautir við leikskóla og grunnskóla. Ég óskaði eftir mælingu á loftgæðum í hverfinu í fyrsta sinn í tíu ár, kallaði eftir fleiri hjólabogum, bættri lýsingu og umferðaröryggi fyrir framan ÍR-svæðið. Fékk samþykkta vetrarþjónustu fyrir hjólreiðar á brúnni yfir Reykjanesbraut og hef fylgst með nýju göngu- og hjólabrúnni yfir Dimmu. Ég hef talað fyrir því að byggja upp fjölbreytilega útivist á Austurheiðum (Hólmsheiði ‒ Grafarheiði ‒ Reynisvatnsheiti), meðal annars aðstöðu fyrir skíðagöngu og fjallahjólaleið. Upplagt að fá sána við Nauthólsvík og við þurfum þéttara net hjólastíga í Austurborginni í samræmi við nýja hjólreiðaáætlun sem ég er með í að móta. Ég er þakklát fyrir þau tækifæri sem ég hef fengið með vinnunni í borgarstjórn, traustið sem mér hefur verið sýnt og ekki síst fyrir hvatningu undanfarið til að halda áfram að gefa af mér fyrir borgarbúa.

Ég er ófeimin við að segja að ég er öflugur fulltrúi úr austurborginni og býð fram þekkingu og reynslu sem styrkir öfluga liðsheild Samfylkingarinnar fyrir borgarstjórnarkosningarnar í vor, og eykur samheldni allra sem búa í borginni og búa borgina til.

 Ég býð fram ferskan andvara úr austri, Breiðhylting í borgarstjórn!